Wakati mjadala kuhusu mwelekeo wa kisiasa na uongozi nchini ukiendelea kushika kasi, mwandishi na mchambuzi wa masuala ya jamii, Emily Mwakilembe, ameibuka na kile anachokiita “utabiri” wa mabadiliko makubwa katika mifumo ya uongozi nchini.
Katika andiko lake lenye kichwa, “Utabili Wangu ni Huu!! Jiandaeni Kisaikolojia,” Mwakilembe anatoa mtazamo wake kwamba huenda kukawa na mabadiliko katika Baraza la Mawaziri, uongozi wa mikoa na wilaya, wakurugenzi pamoja na mfumo wa Jeshi la Polisi.
“Utabili wangu nimeuweka mezani, muda ndio utasema kama nilikuwa nabashiri au nilikuwa nasoma alama za nyakati,” anaeleza.
Hata hivyo, hayo ni maoni na utabiri wake mwandishi, na sio taarifa rasmi ya serikali kuhusu mabadiliko yaliyopangwa.
Katika utabiri wake, Mwakilembe anaona uwezekano wa Baraza la Mawaziri kupita katika mabadiliko makubwa.
Kwa lugha ya kisitirai na yenye utani, anaashiria kile anachokitazama kama haja ya “kuondoa mabaki na kufuta nyayo” za mifumo iliyokuwapo kabla.
Mtazamo wake unaonekana kujengwa juu ya matarajio kwamba uongozi unaweza kutaka kuunda mfumo wake wa kufanya kazi na kuweka watu wenye kuendana na mwelekeo mpya wa kisera na kiutendaji.
Lakini swali linabaki: Je, kweli kutakuwa na mabadiliko makubwa kiasi hicho? kwa sasa, hakuna ratiba rasmi iliyotolewa kuthibitisha utabiri huo.
Mwakilembe pia ameelekeza macho yake kwa Wakuu wa Mikoa na Wakuu wa Wilaya, anatabiri kile anachokiita “magazijuto”, akimaanisha mchanganyiko mkubwa wa mabadiliko, uteuzi na uhamisho katika safu za viongozi hao.
Kwa mtazamo wake, wale waliokuwa wakishikilia madaraka kwa matumaini ya kubaki katika nafasi zao wanapaswa kujiandaa kwa mabadiliko.
“Wale waroho wa madaraka, sasa tumbo moto!” anaandika kwa mtindo wake wa utani.
Kwa upande wa Wakurugenzi, Mwakilembe anaamini mabadiliko yanaweza kuwafikia pia, ingawa kwa kiwango ambacho yeye mwenyewe anakiona kuwa huenda kisiwe kikubwa kama katika maeneo mengine ya uongozi.
Lakini ujumbe wake unabaki uleule:
MFUMO UNAWEZA KUWA UNAANZA KUBADILIKA.
Kwa maneno yake, “mchezo umeanza kubadilika,” huku akisisitiza kuwa wale waliopo kwenye nafasi mbalimbali za mamlaka wanapaswa kuwa tayari kisaikolojia kwa mabadiliko yoyote yatakayokuja.
POLISI: “MAMBO NI MOTO”
Jeshi la Polisi nalo halikuachwa nje ya utabiri wa Mwakilembe.
Anasema mfumo huo nao unapaswa kujiandaa kwa kile anachokiona kama kipindi cha mabadiliko, akitumia lugha ya utani kwamba “joto bado lipo nyuzi 37.”
Mwandishi huyo anakumbusha kuwa bado ni mwaka 2026 na kipindi tangu viongozi wa sasa waapishwe hakijamalizika kwa muda mrefu.
Hivyo, kwa mtazamo wake, bado kuna nafasi ya kuona maamuzi na mageuzi zaidi kabla mwaka haujafikia tamati.
TAHADHARI KUBWA: “NCHI HAINA UMOJA”
Lakini mbali na utabiri wa mabadiliko ya viongozi, sehemu nzito zaidi ya andiko la Mwakilembe inahusu hali ya umoja katika jamii.
Anasema, kwa mtazamo wake, Tanzania inapitia kipindi kigumu ambapo makundi mbalimbali yanaonekana kutokuwa na sauti moja.
Anataja jamii, serikali, vyama vya siasa, taasisi na makundi ya kidini kuwa kila upande una msimamo na sauti yake.
Kwa Mwakilembe, hali hiyo inaweza kuwa hatari iwapo itaendelea kukua bila kutafutwa kwa maridhiano.
“Kama tukiendelea kuyaacha haya yakue na kuzeeka pasipo maridhiano, tutafika mahali tukose hata mzee mmoja anayeweza kutuliza mawimbi ya hasira na chuki kwenye kasia ya nchi yetu,” anaonya.
Kwa lugha yake, hata wazee na viongozi wenye uzoefu, ambao mara nyingi jamii hutegemea kuwapoza wananchi wakati wa misuguano, wanaweza kujikuta wakiwa katika makundi yenye misimamo tofauti.
JE, MARIDHIANO YAMECHELEWA?
Swali linalojitokeza katika tahadhari ya Mwakilembe ni kama Tanzania inahitaji kuweka mbele zaidi mazungumzo na maridhiano kabla tofauti za kisiasa na kijamii hazijawa kubwa zaidi.
Ujumbe wake unaelekeza kwenye hitaji la kusikilizana, kupunguza hasira na kuhakikisha tofauti za mawazo hazigeuki kuwa migawanyiko ya kudumu.
Kwa sababu, kama kila kundi litaendelea kuzungumza lugha yake bila kusikiliza upande mwingine, inaweza kufika wakati ambapo kutakuwa na sauti nyingi lakini hakuna sauti yenye uwezo wa kuunganisha wote.
“HATA MBWA AMEPOTEZA UWEZO WA KUNUSA!”
Katika kufunga utabiri wake, Mwakilembe anatumia tena lugha ya mzaha kueleza namna anavyoiona hali ya sasa kuwa yenye utata.
“Hapa hata mbwa amepoteza uwezo wa kunusa, sijui kama atakumbuka kwao!” anaandika.
Lakini nyuma ya mzaha huo kuna ujumbe mkubwa: mazingira ya sasa, kwa mtazamo wake, yanaweza kuwa magumu kiasi kwamba ni vigumu kwa wengi kutabiri kwa uhakika mwelekeo wa mambo yanayofuata.
Ndiyo maana ameweka utabiri wake wazi na kuiachia historia kazi ya kutoa hukumu.
UTABIRI UMEWEKWA MEZANI
Je, kutakuwa na mabadiliko makubwa katika Baraza la Mawaziri? Je, Wakuu wa Mikoa na Wilaya wataguswa? Je, Wakurugenzi na mfumo wa Jeshi la Polisi nao wataingia kwenye wimbi la mabadiliko?
Na muhimu zaidi, je, viongozi na jamii watafanikiwa kupata njia ya maridhiano kabla migawanyiko iliyopo haijawa mizizi ya kudumu?
Kwa Emily Mwakilembe, majibu ya mwisho hayahitaji kubishaniwa sasa.
.png)
0 Maoni